شاب يناشد وزير الداخلية.. احتاج حقوقي من هيئة ذوي الإعاقة

ناشد شاب وزير الداخلية الشيخ محمد الخالد قائلاً:  أتكلم إليك بشكل عادي لاني تعبت من الكلام الرسمي وبقول اللي بقلبي .. انا شاب من ذوي الاعاقة .. تعرضت الى حادث سيارة سبب لي كسر بالظهر بعيد الشر عنك وصار لي شلل رباعي وتسجلت قضية ضد مجهول الحمدالله على كل حال

واضاف الوالدة كويتية والوالد غير كويتي وخدم بالجيش 38 سنة وشارك بتحرير الكويت .. الموضوع المادة 3 من قانون المعاقين رقم 2010/8 تقول

وأشار يعامل الشخص ذو الإعاقة غير الكويتي من أم كويتية منذ ميلاده معاملة الكويتي مدى الحياة بقرار يصدر من وزير الداخلية وفقا للقانون رقم 21 لسنة 2000 بتعديل بعض أحكام المرسوم الأميري رقم 15 لسنة 1959 الخاص بقانون الجنسية الكويتية

وأوضح يعني لازم اجيب كتاب معاملة كويتي من وزارة الداخلية علشان اخذ حقوقي من هيئة ذوي الاعاقة، لكن هالماده لم يتم تفعيلها من اربع سنوات ونص بحجة هناك تعارض بين قانون المعاقين وقانون الجنسية ، سؤالي لك منو الاولى مصلحة المعاق ام قانون الجنسية اللي هو من صنع البشر !! واللي عطل كل حياتي .. احيانا ماا اقدر اشتري ابسط الاغراض الطبية مثل حفاظات وقطن وشاش

وزاد انا الى الان ماقدر اشتري سياره خاصة للمعاقين اروح فيها للمستشفى اسوي علاج طبيعي .. صار فيني ضمور بالعضلات من سدحت السرير .. احتاج ممرض يقلبني على السرير علشان لايصير فيني تقرحات بالجلد وشركات الرعاية المنزلية تاخذ بالشهر 360 دينار من وين ادبرها وانا عاجز !! والنفسية الله يعلم فيها

واختتم انا حاس ان في امل انك راح تقرأ رسالتي وتوقف معاي كل اللي ابيه تفعيل القانون بس وجزاك الله الف خير

ولدك فيصل الشمري